EP. 6 片頭
各位線頂ê聽眾朋友ta̍k-ê平安ta̍k-ê好，歡迎收聽做工á人pha-kheh-su̍h-to͘h，真歡喜koh hâm ta̍k-ke tī空中再相會！
今á日去病院回診，tú好隔壁坐1 ê伯--á mā teh等叫號，凡勢是無聊，chŏaⁿ hâm我leh開講，伯--á 80 gōa--ā，m̄-koh精神ûn-ná kài好，中氣kài飽，to̍h耳空小可á khah重niâ。
眞心適neh，lín lóng leh káng siáⁿ。
Mā無sáⁿ重點，伊to̍h leh講in囝in孫ê tāi-chì án-ne。M̄-koh hoⁿh，聽in he頂iân ê sī大人teh講ê台語，真正kah咱chit輩--ê無kāng款 neh。
Án-chóaⁿ講？
In ê話句khah短，語法mā無siáⁿ kâng，khah bē像咱án-ne，tiāⁿ-tiāⁿ 1句話牽kah lò-lò長。咱che khah少年--ê lóng加減á ē受tio̍h中國話ê影響，jú少年--ê to̍h jú明顯。
Án-ne咱nā有機會tio̍h ài ke去chhōe chē歲人開講，ke學kóa in講台語ê氣口，像goán姑婆mā beh 90--ah，有êng我to̍h beh來去伊hia行行--leh。
Hiò͘，sēng-sòa連絡感情--lah，che老大人lóng mā sī kìⁿ 1 páiⁿ kiám 1 páiⁿ--ê，有êng ài ke去行踏--1-ē。
是--lah，有影！Sòa--lòe咱時間mā差不多--a。
Hèⁿ！勞煩--你！
請奏音樂！
Kok-ūi sòaⁿ-téng ê thiaⁿ-chiòng pêng-iú ta̍k-ê pêng-an ta̍k-ê hó, hoan-gêng siu-thiaⁿ chò-kang-á-lâng pha-kheh-su̍h-to͘h, chin hoaⁿ-hí koh hâm ta̍k-ke tī khong-tiong chài-siong-hōe!
Kin-á-ji̍t khì pēⁿ-īⁿ hôe chín, tú hó keh-piah chē 1 ê peh--á mā teh tán kiò hō, hoān-sè sī bô-liâu, chŏaⁿ hâm góa leh khai-káng, peh--á 80 gōa--ā, m̄-koh cheng-sîn ûn-ná kài hó, tiong-khùi kài pá, to̍h hīⁿ-khang sió-khóa-á khah tāng niâ.
Chin sim-sek neh, lín lóng leh káng siáⁿ.
Mā bô sáⁿ tiōng-tiám, i to̍h leh kóng in kiáⁿ in sun ê tāi-chì án-ne. M̄-koh hoⁿh, thiaⁿ in he téng-iân ê sī-tōa-lâng teh kóng ê Tâi-gí, chin-chiàⁿ kah lán chit pòe--ê bô kāng-khoán neh.
Án-chóaⁿ kóng?
In ê ōe-kù khah té, gí-hoat mā bô siáⁿ kâng, khah bē chhiūⁿ lán án-ne, tiāⁿ-tiāⁿ 1 kú ōe khan kah lò-lò-tn̂g. Lán che khah siàu-liân--ê lóng ke-kiám-á ē siū tio̍h Tiong-kok-ōe ê éng-hióng, jú siàu-liân--ê to̍h jú bêng-hián.
Án-ne lán nā ū ki-hōe tio̍h ài ke khì chhōe chē hòe lâng khai-káng, ke o̍h kóa in kóng Tâi-gí ê khùi-kháu, chhiūⁿ goán ko͘-pô mā beh 90--ah, ū êng góa to̍h beh lâi-khì i hia kiâⁿ-kiâⁿ--leh.
Hiò͘, sēng-sòa liân-lo̍k kám-chêng--lah, che lāu-tōa-lâng lóng mā sī kìⁿ 1 páiⁿ kiám 1 páiⁿ--ê, ū-êng ài ke khì kiâⁿ-ta̍h--1-ē.
Sī--lah, ū-iáⁿ! Sòa--lòe lán sî-kan mā chha-put-to--a.
Hèⁿ! Lô-hoân--lí!
Chhiáⁿ chàu im-ga̍k!
EP. 6 片尾
Tú chiah你講tio̍h chia ê序大人lóng kìⁿ 1 遍kiám 1 piàn，想想--leh心情soah淡薄á悶悶。
Chit-lō tāi-chì我ka-tī是感覺隨緣lah，ta̍k ê人lóng mā ē行到hit步，當做kah你坐kāng班車ê人，有ê人seng到站，先落車--a，khah樂觀--leh ka看待to̍h好。人tī chit ê世間lóng是寄tòa--ê niâ。M̄ koh我顛倒是khah iàu-ì咱ē-tàng留siáⁿ-mih物件--落-來。
Ŏ͘？你ē想beh kā siáⁿ留--落-來？
其實想beh留ê mi̍h-kiāⁿ mā kài chē--lah。私人ê tāi-chì to̍h先mài講，nā 是khah公眾方面--ê，siōng無我希望ē-tàng kā咱chit-má koh ē曉講ê台語，加減á ka保存--落-來，用有閒ê時間來做chia事工，做jōa chē算jōa chē--lah。資料有留--落-來，以後ê人nā有需要，to̍h用ē tio̍h！咱ê台語雖bóng無咱頂iân ê人hiah好，m̄-koh加減--lah，我想是加減á有效chiah tio̍h。
Hèⁿ ā，人ē-tàng用ê時間mā真有限，咱盡量phah-piàⁿ--lah。最近你講ê話題lóng khah嚴肅neh，是去lòng tio̍h頭hio͘h?
Siáⁿ-mih leh lòng tio̍h頭？我tú-tio̍h-á mā是ē想要緊ê tāi-chì好--無？看貓無點neh lí！
Ài khoe bóng khoe--lah！今á日節目ê時間ûn-ná 差不多--a，真歡喜再次hâm各位朋友相會，後禮拜kāng 1 ê時間koh來捧場ŏ͘。Pái-pāi！
Tú chiah lí kóng tio̍h chia ê sī-tōa-lâng lóng kìⁿ 1 piàn kiám 1 piàn, siūⁿ-siūⁿ--leh sim-chêng soah tām-po̍h-á būn-būn.
Chit-lo tāi-chì góa ka-tī sī kám-kak sûi-iân lah, ta̍k ê lâng lóng mā ē kiâⁿ kàu hit pō͘, tòng-chò kah lí chē kāng-pan chhia ê lâng, ū ê lâng seng kàu chām, seng lo̍h-chhia--a, khah lo̍k-koan--leh ka khòaⁿ-thāi to̍h hó. Lâng tī chit ê sè-kan lóng sī kià-tòa--ê niâ. M̄ koh góa tian-tò sī khah iàu-ì lán ē-tàng lâu siáⁿ-mih mi̍h-kiāⁿ--lo̍h-lâi.
Ŏ͘? Lí ē siūⁿ beh kā siáⁿ lâu--lo̍h-lâi?
Kî-si̍t siūⁿ beh lâu ê mi̍h-kiāⁿ mā kài chē--lah. Su-jîn ê tāi-chì to̍h seng mài kóng, nā sī khah kong-chiòng hong-bīn--ê, siōng bô góa hi-bāng ē-tàng kā lán chit-má koh ē-hiáu kóng ê Tâi-gí, ke-kiám-á ka pó-chûn--lo̍h-lâi, iōng ū-êng ê sî-kan lâi-chò chia sū-kang, chò jōa chē sǹg jōa chē--lah. Chu-liāu ū lâu--lo̍h-lâi, í-āu ê lâng nā ū su-iàu, to̍h iōng ē tio̍h! Lán ê Tâi-gí sui-bóng bô lán téng-iân ê lâng hiah hó, m̄-koh ke-kiám--lah, góa siūⁿ sī ke-kiám-á ū-hāu chiah tio̍h.
Hèⁿ ā, lâng ē-tàng ēng ê sî-kan mā chin iú-hān, lán chīn-liōng phah-piàⁿ--lah. Chòe-kīn lí kóng ê ōe-tê lóng khah giâm-siok neh, sī khì lòng tio̍h thâu hio͘h?
Siáⁿ-mih leh lòng tio̍h thâu? Góa tú-tio̍h-á mā sī ē siūⁿ iàu-kín ê tāi-chì hó--bô? Khòaⁿ niau bô tiám neh lí!
Ài khoe bóng khoe--lah! Kin-á-ji̍t chiat-bo̍k ê sî-kan ûn-ná chha-put-to--a, chin hoaⁿ-hí chài-chhù hâm kok-ūi pêng-iú siong-hōe, āu-lé-pài kāng 1 ê sî-kan koh lâi phâng-tiûⁿ ŏ͘. Păi-pāi!
